Journalist Håkon Haugsbø i NRK Brennpunkt har fått Alf Helleviks mediemålpris.
Under årsmøtet i Litteraturselskapet Det Norske Samlaget torsdag vart prisen med namn etter den kjende nynorskmannen delt ut. Alf Hellevik (1909- 2001) frå Fjaler i Sogn og Fjordane har hatt stor innverknad på utviklinga av det nynorske skriftspråket i moderne tid, kjend for nynorskbrukarar flest gjennom stadige nyutgjevingar av Nynorsk ordliste.

Prisen i hans namn vert delt ut til yngre nynorskbrukarar i radio og fjernsyn som har fremja godt normalisert talemål.

Prismottakar Håkon Haugsbø frå Førde har vore journalist og programleiar i NRK Brennpunkt i ti år, programmet som driv undersøkjande journalistikk i statskanalen på tysdagar.

- Eg er lukkeleg og glad for den. Og mintest Ingolf Håkon Teigene i takketalen, skreiv Haugsbø på om tildelinga på Twitter.

Alf Helleviks mediemålpris er på 10.000 kroner. Blant dei tidlegare mottakarane av prisen er Line Fuglehaug, som då arbeidde i P4, og Harald Thingnes, programleiar i NRK-sporten. (©NPK)

Me vil med dette kalla inn til årsmøte i Kringkastingsringen 18. mars kl. 1800, på skrivarstova Lilletorget 1.

Det blir lett servering.

Kringkastingsringen inviterer til ope møte om nynorsk i NRK Super på Litteraturhuset, Kvernelandrommet, 8. november kl. 19.00. Til møtet har me fått inn ingen ringare enn kanalsjef Nils Stokke og språkprofessor Unn Røyneland.

NRK Super har hatt ein formidabel vekst i nynorskprosenten frå 9,2 til 18 prosent. Korleis har dei fått til det? Kva problem har dei hatt på vegen til 18 prosent? Og kor viktig er det eigentleg for born å høyra nynorsk på barneTV? Kva effekt har det? Desse spørsmåla vil me truleg få svar på denne kvelden.

Unn Røyneland er tilsett ved Institutt for lingvistiske og nordiske studier (ILN) ved Universitetet i Oslo, og har mellom anna forska på ungdomsspråk, språklege haldningar og språkplanlegging.

Møtet er gratis.

Vel møtt!

Kringkastingsprisen for 2012 blei tildelt Knut Magnus Berge kl. 14.00 på Det Norske Teatret.

Juryen skriv i grunngjevinga at Berge har utmerkt seg med eit tydeleg, men levande språk som folk forstår både skriftleg og munnleg. Jamvel om vinnaren ikkje nyttar ei fullt ut normalisert tale i eteren, har fleire nominert han med den grunngjevinga at han brukar eit godt og konsekvent nynorsk. Juryen meiner han framstår som ein framifrå ambassadør for nynorsk som etermediespråk.

– Knut Magnus Berge kommuniserer godt og naturleg, og det er lett å følgje kommentarane hans, samstundes som han framstår med ei tyngde som sømmer seg sakene han kommenterer, seier Martin Toft, leiar i Kringkastingsringen, under tildelinga av prisen. – Det er ei ære å gje prisen til ein som klarer å gå denne vanskelege balansegangen, held han fram.

Kringkastingsprisen skal gå til ei røyst som utmerkar seg med godt språk i radio eller fjernsyn, og som på ein framifrå måte bruker nynorsk eller dialekt i det daglege arbeidet.