Kringkastingsringen

Kringkastingsringen gratulerer NRK med nynorsk-vekst

admin — Wed, 11 Apr 2012 20:26:04 +0000

NRK har brukt meir nynorsk i alle kanalar utanom P3. Det syner årsrapporten for 2011 som er tilgjengeleg på nrk.no (http://www.nrk.no/aarsrapport/2011/). Den største framgangen står barnekanalen NRK Super for. Den har auka nynorskbruken frå 9,2 til 18 prosent.

- Dette er svært gledeleg, og Kringkastingsringen vil gjerne gratulera NRK Super med ein fantastisk prestasjon. Det er eit godt døme på at redaksjonen har arbeidd målretta for å sikra at nynorsk og dialekt er til stades på heile sendeflata, frå dubba animasjonsfilmar, via programleiarar i Barne-TV til store kvalitetsseriar som Vaffelhjarte, seier styreleiar Martin Toft i Kringkastingsringen.

Statistikken frå Ipsos MMI viser også at folkekanalen P1 og NRK2 har meir enn det pålagde kravet om 25 prosent. – Dette er flotte tal og viser at det er fullt mogleg å nå målet om 25 prosent nynorsk når det blir arbeidd hardt og strategisk for å få det til, understrekar Toft.

Han meiner det er grunn til å tru at den gode dialogen Kringkastingsringen, Noregs Mållag og Norsk Målungdom har med NRK-leiinga og med NRK Super har spelt ei rolle for at nynorskbruken aukar i statskanalen. – For dei delane av NRK som framleis seier at det ikkje nyttar å auka nynorskdelen meir seier me; Sjå på NRK Super. Me gratulerer både NRK og NRK Super med eit glimrande resultat og ser fram til å halda fram med dei gode samtalane med toppleiinga, seier styreleiar Martin Toft i Kringkastingsringen.

Pressemelding 11.04.2012
(sjå òg utdanning.no)

Lovande tal frå NRK

admin — Wed, 11 Apr 2012 13:20:39 +0000

Kvart år legg NRK fram ein årsrapport der dei gjer greie for korleis dei har stetta allmennkringkastaroppgåvene sine. Rapporten for 2011 er no tilgjengeleg på nettsidene til NRK (òg i PDF-utgåve).

Medan nynorsk-tala for 2010 var nedslåande lesnad, gjekk det oppover med nynorskbruken i 2011 i alle dei store kanalane bortsett frå NRK P3. Det er òg verd å merka seg at NRK Super har nær dobbelt så mykje nynorsk i 2011 som dei hadde i målinga for 2010 (frå 9.2 % til 18 %).

Trass den tydelege betringa, er det berre to av kanalane (P1 og NRK2) som greier kravet om minst 25 prosent nynorsk. Her kan du sjå ei samanstilling for utviklinga 2005-2011. Dersom du vil sjå kor mange som ser på dei ulike kanalane, rår vi til å sjå på sjølve rapporten.

Bryn og Riise vart «årets nynorskbrukarar»

admin — Wed, 11 Apr 2012 10:15:51 +0000

Styret i Nynorsk kultursentrum har kåra Ingvill Bryn og Arild Riise til årets nynorskbrukarar i 2012. Les meir hjå Ivar Aasen-tunet.

Stilling ledig

admin — Thu, 29 Mar 2012 08:11:15 +0000

Kringkastingsringen søkjer etter ny dagleg leiar frå 1. august 2012. Kjenner du nokon som kan vera aktuelle kandiatar? Tips gjerne både oss og dei. Sjå fullstendig utlysing her.

Målpris til Eva Westvik

admin — Thu, 15 Mar 2012 12:14:37 +0000

Eva Westvik, kvinna bak dokumentarseriane Her er eg og Klart eg kan (kjende frå NRK Super) fekk målprisen frå Sogn og Fjordane Mållag i 2012. Les meir hjå Noregs Mållag.

Ny NRK P1

admin — Mon, 12 Mar 2012 10:03:05 +0000

I dag legg NRK P1 om sendeskjemaet. Det vert meir underhaldning og færre faste program. Les meir i Aftenposten.

Årsmøte i Kringkastingsringen – 29.3

admin — Tue, 06 Mar 2012 14:31:56 +0000

Vi orsakar feil dato i Dag og Tid (fredag 9. mars)

Årsmøte i Kringkastingsringen

Tid: torsdag 29. mars klokka 18.00

Stad: Schweigaards gate 16, Oslo (andre høgda på Statoil-stasjonen)

Følg med på desse sidene for sakpapir og meir informasjon!

Sakpapir

Sak 1: Konstituering (PDF)
Sak 2: Årsmelding 2011 (PDF)
Sak 3: Rekneskap 2011
Sak 4: Arbeidsplan (PDF – revidert framlegg frå styremøte 22.03.2012)
Sak 5: Budsjett 2012
Sak 6: Årspengar 2013
Sak 7: Fråsegner (PDF)
Sak 8: Val

Er ikkje nynorskungar norske?

admin — Tue, 24 Jan 2012 23:31:25 +0000

… spør Noregs Ungdomslag etter at NRK Super valde å laga ei tevling i spørjeprogrammet Superkviss der deltakarane skulle gissa om ord var nynorsk eller svensk. Les meir hjå NU.

Giske til kontrollkomiteen?

admin — Fri, 20 Jan 2012 09:54:12 +0000

Framstegspartiet er ikkje nøgd med orienteringa Giske gav om TV2-salet, og ønskjer saka inn for kontroll- og konstitusjonskomitéen på Stortinget. Les meir i Dagsavisen.

Egmont kjøper TV2

admin — Mon, 09 Jan 2012 09:01:08 +0000

Det danske mediekonsernet Egmont kjøper A-pressen sin del av TV 2, og dimed heile mediehuset. Dei tilsette røysta mot framlegget. Egmont lovar at oppkjøpet ikkje kjem til å ha noko å seia for profilen til TV2. Til Kampanje seier Hans J. Carstensen, styreleiar i TV 2 og finansdirektør i Egmont: «– Som eiere stiller vi oss hundre prosent bak TV 2s avtale med den norske stat, som innebærer at TV 2 er allmennkringkaster med hovedkontor i Bergen».

Nærings- og handelsminister Trond Giske har tidlegare uttalt seg negativt om sal av TV 2.

Les meir i Dagbladet, Kampanje og Dagens Næringsliv.