I løpet av relativt kort tid får stendig fleire av oss mange nye TV-kanalar inn i stova. Men NRK3 og den nye barnekanalen NRK Super er berre nokre av kanalane i det nye digitale kabelnettet. TV-tilbodet har vorte større, men kanskje også smalare og meir einsretta
- både i språk og programvariasjon.

Eg har tre kommentarar om NRK etter ein knapp månad med digital-TV.

Det eine er spørsmålet om NRK er like stødig som allmennkringkastar som tidlegare. Har allmennkringkastarrolla vorte problematisk som fylgje av oppsplittinga og reindyrkinga av profilane til TV-kanalane? Å vera allmennkringkastar inneberer mellom anna å tilby ei breidde i programma, der både program som vert sett på som ”finkulturelle” og ”smale” skal visast, men også ”breie publikumsuksessar”. NRK har vore ”limet i nasjonen”, og for å bruka orda til Einar Førde-biograf Frank Rossavik: ein institusjon som skulle binda saman folkegrupper og landsdelar. Den nye oppsplittinga av NRK gjer TV-tilbodet meir segmentert. Jostein Gripsrud, professor i medievitskap ved Universitetet i Bergen, uttalte seg kritisk til den nye differensierte TV-kvardagen i Klassekampen tidlegare i haust. Han meinte oppsplittinga kan føra til ei stadfesting av sosiale skiljelinjer. Frykta er at dei meir krevjande programsjangrane vert lagde til P2-liknande konsept, som i dag vert oppfatta som smalare og mindre folkeleg enn P1. Kanskje er dei tre TV-kanalane til NRK med på å forsterka dei kulturelle og sosiale skilnadene mellom sjåarane, stikk i strid med det som har vorte oppfatta som eit viktig ideal for allmennkringkastinga.

Det andre momentet er at denne oppsplittinga er med på å føra til ei språkleg einsretting. Kringkastingsringen vil ha fleire norskproduserte program, program frå heile landet, varierte i språk og innhald. Vi vil ha fleire program der nynorsk normaltalemål og dialekt vert snakka, og vi vil at utanlandske program skal vera teksta på nynorsk. Så langt er ikkje inntrykket at NRK3 scorar høgt på nynorskprosenten – og heller ikkje på norskproduserte program. Kringkastingssjef Hans-Tore Bjerkaas bad Stortinget om ei ekstra løyving for å kunna laga fleire program til NRK3 i Noreg, diverre utan hell. Dei norskproduserte programma skal verta kanaliserte inn i NRK Super og i NRK2. Vi i Kringkastingsringen gler oss til 1. desember då NRK Super vert lansert, og vonar på barneprogram der ungane talar dialekt, og der programma kjem frå heile Noreg!

Min tredje kommentar er: NRK3 må ut til alle! Difor er Kringkastingsringen glade for at Medietilsynet har bestemt at NRK3 også skal finnast analogt, slik at det ikkje berre er dei som har skaffa seg ein dekoder som får inn NRK3. Alle som har kanalnettverk frå Get og Canal Digital skal no kunna sjå NRK3 utan dekoder-boksen. På vegen mot full utbygging av det digitale bakkenettverket må NRK syta for at flest mogleg har høvet til å sjå det NRK tilbyr. Vi hugsar alle kampen om å få NRK2 ut til folket. Vi vil ikkje ha ein ny runde!

Eva Marie Mathisen
dagleg leiar i Kringkastingsringen

i Norsk Tidend nr. 4 - oktober 2007