I eit brev til kulturdepartementet bed Kringkastingsringen og Noregs Mållag kulturminister Trond Giske om å krevja at kringkastingssjef Hans-Tore Bjerkaas legg fram ein plan for korleis NRK kan greia kravet om 25 prosent nynorsk.

Dette står i brevet:

Vi syner til Allmennkringkastingsrapporten for 2008, som Medietilsynet la fram 04. juni 2009. Rapporten viser at NRK bryt kravet som er stilt i NRK-plakaten, punkt 3d. Punktet slår fast at ”minst 25 prosent av innholdet skal være på nynorsk”.

Konklusjonen frå Medietilsynet er at ”NRK innfrir imidlertid ikke kravet om at 25 prosent av verbalinnslagene skal være på nynorsk” (del V, s. 57). I rapporten skriv tilsynet òg:

NRK har i flere års regnskaper redegjort for tiltak som er satt i verk for å øke nynorskbruken i kanalene, som Nynorsk mediesenter i Førde. Medietilsynet mener det er å forvente at de ulike tiltakene NRK har satt i verk for å øke nynorskbruken, nå må komme til uttrykk i det faktiske programtilbudet til NRK på en slik måte at den negative trenden snus. (s. 56-57)

Sidan Allmennkringkastingsrapporten 2008 er sett opp som sak 6 på generalforsamling i NRK 10. juni 2009, vil vi med dette be om at NRKs eigar, kulturminister Trond Giske, rettar eit direkte spørsmål til kringkastingssjef Hans-Tore Bjerkaas der han spør etter ein tiltaksplan for korleis NRK skal greia kravet om minst 25 prosent nynorsk i sendingane.